- Enpresa erakusketarien % 19 frantziarrak dira
- Nobedade gisa, bigarren eskuko ontziak egongo dira aurten
- Sarrera eta aparkalekua dohainik dira
Ababor azoka nautikoaren hirugarren edizioa itsasoratzeko prestatzen ari dira Ficoban, Gipuzkoako erakustazokan. Bi urtez behingo hitzordu bat bihurtu da, eta sektoreko enpresen ordezkaritza zabala izaten da bertan (40 enpresa erakusketari), eta, horrekin batera, lehen eta bigarren eskuko ontzi-eskaintza zabala, eta ondorioz, azokaren erakusketa-azalera ere handitu egin behar izan da.
Sektorearen terminologia erabiliz, esan daiteke Ababorrek haizea poparean duela. Lehenengo bi edizioetan arrakasta lortu ondoren, Ababor garrantzi handiko ekitaldi bat bihurtu da eskualdean, eta 80 enpresa erakusketari eta ia 10.000 bisitari erakarri ditu. Datu horien arabera, Ababor erreferente bihurtu da nautika eta sektore osoa maite dutenentzat, eta, horregatik, iragarri daiteke azokaren hirugarren edizioa ona izango dela.
Aurrekoetan bezala, azokak Eusko Jaurlaritzaren babesa du, EKP (Euskal Kirol Portuak) erakundearen eta Mugikortasun, Turismo eta Lurralde Antolamendu Sailaren bitartez. Bestalde, sektore nautikoa Enpresa Nautikoen Elkarte Nazionalak (ANEN) ordezkatzen du.
Erakusketa-eskaintza
Ababor publiko handiko azoka da, eta aisiarako nautikarekin eta jarduera nautikoekin lotutako sektore guztiak erakarri nahi ditu, aisia-ontziak (berriak eta/edo aukerakoak), turismoa eta ur-esperientziekin lotutako zerbitzuak gero eta jende gehiagoren esku jartzeko.
40 enpresa erakusketari eta 30 itsasontzi baino gehiagorekin, azokak plataforma paregabea eskainiko du sektoreko azken berrikuntzak ezagutzeko, hala nola motorrak, atoiak, elektronika eta osagarriak, zerbitzuak, turismoa eta itsas eskolak, aseguruak, eta baita arrantzarako osagarriak eta ur-motorrak ere. Besteak beste, Jeanneau, Beneteau, Highfield, Lagoon, Yamaha eta Volvo marka ezagunak izango dira Ababorren.
Profil nautiko guztietarako jarduera-programa
Ababor 2025 erakusleiho komertzial bat baino askoz gehiago da. Elkartzeko eta ikasteko gunea ere bai baita. Hiru egunetan, bisitariek eta profesionalek aukera izango dute Euskal Kirol Portuak (EKP) erakundeak babestutako hitzaldi-programa zabal batean, mahai-inguruetan eta jarduera praktikoetan parte hartzeko.
Ababorren jarduera paraleloen programa ere berezia izaten da, gai askotarikoak izaten baitira. Baldintza egokietan, askotan muga-mugan, nabigatzen duten pertsonen esperientziak dira programaren proposamenetako batzuk.
Guillermo Cañardok eta Pedro Eurrutiak White Shadow ontzian munduari bira nola eman zioten kontatuko dute. 1978ko Swan 57 ontzi bat da, eta Ocean Globe Race lasterketan parte hartu zuen espainiar ontzi bakarra izan zen.
Mikel Sarasolak kayakean izandako abentura azalduko du Ababorren: glaziarren gainean ur bizietako lehen kayak-esperientzia bihurtu da.
Itsasoa muga-mugan nabiga daiteke, bai eta beste hainbat modutan ere. Izar de la Hoz, ontzigintzako patroi eta mekanikaria; Jaime Framis, Youth America’s Cup-en finalaurrekora iritsia uda honetan Bartzelonan, eta gaur egun Moth-en lehiatzen, banakako foileatzaile-klasea eta mundu mailan maila altuena duen klaseetako bat; Innoboat proiektuak eta Laura Quinto kazetariak, bere ibilbidea komunikazio nautikoan egin duenak, “Itsaso bat, nabigatzeko modu asko” mahai-inguruan itsasoa gozatzeko modu ezberdinak erakutsiko dizkigute: ozeanoetako estropada handiak eta nabigazio teknikoa, bela tradizionala, plazerezko nabigazioa edo motordun itsasontzien erabilera.
Itsasoko erronkak ez dira soilik nabigatzaileentzat; izan ere, gaixotasun batek muturreraino eraman dituen eta bere indarra ezagutzen duten pertsonek ere egiten diete aurre horrelako erronkei, esaterako, Reto Pelayo Vida erronkaren hamargarren edizioan Antartika konkistatzeko erronkari.
Beste hainbat gai ere jorratuko dira, hala nola itsas baliabideen jabariari buruzko gatazkek eta nabigazio-bideek nola markatu duten gizateriaren historiaren bilakaera, nabigazioa ulertzeko eta horri aurre egiteko moduei buruzko mahai-ingurua edo nabigatzaileentzako tresna meteorologiko praktikoak.
Sektoreko elkarteak eta proiektuak ontziratu dira
Ababorren edukia aberastu egiten da elkarte berrien parte-hartzearekin, azokarekin bat egin eta eduki interesgarriak ekartzen baitituzte.
Elkarte horietako bat Anavre da, eta aisialdiko ontzietako segurtasun nautikoaren alorrean duen esperientzia ekarriko du Ababorrera. Hainbat gai jorratuko dituzte, hala nola araudia, itsasora ateratzeko aholkuak, arduragabekeria ohikoenak, etab.
Arkeolurrek, bere aldetik, ibilbide bat proposatzen du nabigazioaren oroimenean zehar, Euskadiko portuetako hondoratzeei buruzko lanarekin: euskal gizartean inpaktua izan zuten hondoratzeen memoria historikoa.
Teknologia itsasargi asko baztertzen ari da, baina elkarte batzuek, Euskadiko Itsasargien Lagunak, adibidez, haien memoriagatik borrokatzen dira, haien garrantzia eta historia ezagutaraziz eta zabalduz. Horretaz guztiaz hitz egingo dute Ababorren “Gaueko ziklopeak” izeneko hitzaldian.
Ekimen berritzaileen testuinguruan, InnoBoat Bizkaia-ren parte-hartzea nabarmendu behar da. Bilboko Ingeniaritza Eskolako diziplina anitzeko talde batek osatutako proiektu bat da, eta ingeniaritzaren hainbat alorretako esperientzia eta ezagutza uztartzen ditu. Talde horrek proiektu berritzaileak garatzen ditu ingeniaritza nautikoaren eta itsas jasangarritasunaren alorrean.
Jolasa eta dibertsioa
Jarduera paraleloak Ababorren beste erakargarrietako bat dira. Proposamen bereziki parte-hartzekoak eta erakargarriak izaten dira, hala nola Gaming Gunea. Hor, teknologia, dibertsioa eta lehia konbinatzen dituen esperientzia interaktiboa eskainiko da, ikuspegi akuatikotik betiere. Espazio horrek hiru proposamen nagusi izango ditu: Virtual Regatta (estropaden simulazioa), Mario Kart Nintendo Switch-en eta Súper Mario Party, hori ere Nintendo Switch-en.
Arrantza aukeratzen dutenentzat, lehiaketa birtual bat proposatzen die Ababorrek. Jarduera hori lehiaketako arrantzan aritzen diren profesionalentzat zein edozein zaleturentzat pentsatuta dago.
Eta ezin falta arrauna. Santiagotarrak Klubaren eskutik, indoor arrauneko ergometro-txapelketa egingo da.
Familian: Helikopteroa, uretako Gaming gunea eta askoz gehiago
Helikoptero bat gertutik ikusteak eta bertara igotzeko aukera izateak ere beti eragiten du zirrara. Eguraldiak eta salbamendu-jarduerek aukera ematen badute, Ficobako kanpoko erakusketa-eremuan lur hartuko du “Helimer 223” salbamendu-helikopteroak. Itsas Salbamenduak bere aire-flotan dituen 11 helikopteroetako bat da.
Publiko gazteenarentzat eta familientzat, Ababor 2025 azokak jarduera bereziak eskainiko ditu, hala nola Marino Ababor Murala, itsas ingurunearekiko errespetua sustatzeko sormen gunea, eta Euskal Itsas Museoaren Hondotik Ondarera erakusketa. Proiektu horren asmoa da Gipuzkoako Foru Aldundiaren jabetzako Euskal Herriko Itsasontzi Tradizionalen Bilduma zaharberritu, mantendu, kontserbatu, handitu eta balioan jartzea, eta Euskal Itsas Museoaren eta Albaolaren arteko lankidetzari esker garatu da.
Eta Ababor Hondarribi Dragon Boat ere bertan izango da. Bidasoko uretan nabigatzen duen arraun-talde inklusibo bat da, kirolaren bidez berdintasuna eta integrazioa sustatzen dituena. HS2 Surf Center-ek kudeatzen du proiektua, eta Gipuzkoako Foru Aldundiak babesten du. Jarduera egingarria eta askotariko beharretara moldagarria eskaintzeko diseinatuta dago, bai gizonentzat, bai emakumeentzat.
Dragon Boat oso diziplina gomendagarria da bularreko minbizia gainditu duten pertsonentzat, bai errehabilitazioaren parte gisa bai prebentzio-metodo eta indartze fisikorako metodo gisa. Praktika horrek erresistentzia, koordinazioa eta talde-lana sustatzen ditu, horrela parte-hartzaileen ongizate integralari laguntzeko.
Zozketak barra-barra
Ababorrera etortzeak saria du. Azoka bisitatzen duten guztientzako hainbat eta hainbat zozketa egingo dira, hala nola astebeteko optimist ikastaro bat ume batentzat (8-14 urte) (Hondarribiko Klub Nautikoa), Raqueron paseo bat 4 lagunentzat (Hondarribiko Klub Nautikoa), nabigazio lizentzia bat, 6 metro arteko luzera duten itsasontziak eta ur-motoak pilotatzeko titulu nautikoa, azterketarik eta iraungipenik gabeko titulu bat (Navegabela Nautika Eskola), nabigazio-lizentziarako ikastaro bat (Probanza Nautika Eskola), nabigazio-lizentzia bat (Estatxa Nutika Eskola), 2 lagunentzako irteera bat katamaranen (Les Voiles d’Hendaia-Hendaia Bela), 3 lagunentzako irteera bat Kayaken (Les Voiles d’Hendaia-Hendaia Bela) eta 5 sarrera bikoitz Albaola Itsas Kultur Faktoriarako.
Zozketak martxoaren 31n, astelehenarekin, eguerdiko 12etan egingo dira azokako bisitarien artean.
Txingudiko badia Elkarrekin Ababorren eszenatokia
Azokaren atariko gisa, martxoaren 22an Elkarrekin Ababor jardunaldi nautikoa egingo da Txingudiko Badian. Besteak beste, gurutzaontzien zeharkaldia, arrantza-lehiaketa eta Optimartxoa estropada egingo dira, Euskal Kirol Portuarekin, Hondarribiko Klub Nautikoarekin eta Euskal Bela Federazioarekin elkarlanean antolatuta.
Datu praktikoak
Data: 2025eko martxoak 28-30
Lekua: Ficoba, Irun
Ordutegia: 11:00etatik 20:00etara, ostiral eta larunbatean. Igandean, 11:00etatik 19:00etara
Sarrera dohainik da (aurretik izena hemen emanda: www.ababor.eus)
Ababorreko jarduera programa zabala denez, azokaren web orrian kontsultatzera animatzen zaituztegu. Bertan aurkituko duzue informazio eguneratua. www.ababor.eus.
Erakundeen adierazpenak:
Cristina Laborda, Iruneko alkatea eta Ficoba Fundazioko presidentea.
Urte bat gehiago, nabigazioaren zaletuek Ababor-en hirugarren edizioaz gozatzeko aukera izango dute. Azoka hau inoiz baino indartsuago itzultzen da, erakusle-enpresen parte-hartze handiagoarekin. Honek ez bakarrik azoka, baita Ficoba ere, bilkuraren egoitza nagusi bezala, potentziala baieztatzeko aukera ematen digu. Lehen mailako eta malguko gune bat, esperientzia anitzak eta publiko mota guztientzako harrera egiteko gai dena. Horren adibide dira UNIRE soldadura azokaren edo Ababor nabigazio azokaren antzekoak, nabigazioaren zaleak erakartzen jarraituko dutela agintzen dutenak.
Igor Enparan, Hondarribiko alkatea
Bi urtean behin burutzen den Ababor azokak garrantzi bereziko azoka dela uste dugu. Ekimen publikoa eta pribatua elkarrekin goaz, itsas munduarekin lotura berezia duen azoka da, eta Udaletik prest gaude ahal den guztian lagundu eta aurrera egiteko. Hondarribiko eragileek egiten duten lana goraipatu nahi nuke gero eta indar gehiago hartzen ari den Azoka honetan. Aukera aprobetxatu nahiko nuke herritarrei azoka ikustera joateko, pena merezi du eta.
Azahara Domínguez, diputada de Movilidad, Turismo y Ordenación del. Territorio:
Ababor azoka nautiko hau bezalako ekitaldiek, urte osoan zehar jarduera turistikoa sortzeaz gain, turismo mota berri bat sustatzen dute, nautikoa, fluxu turistikoak modu orekatuagoan banatzen laguntzen diguna; turista gutxiago dauden urteko momentu batean. Gainera, gure eskaintza turistikoa dibertsifikatzean, hainbat pertsona-profil erakartzen dituzten esperientzia paregabeak eta askotarikoak eskain ditzakegu, Gipuzkoako turismoaren hazkunde iraunkorra eta orekatua sustatuz. Ziur gaude Ababor azokak Gipuzkoako garapen turistikoari modu esanguratsuan laguntzen jarraituko duela, gure lurralderako enplegua eta aberastasuna sortuz
Edurne Egaña, EKP (Euskal Kirol Portuak) zuzendaria:
Ababorren hirugarren edizio honek oso une berezi batekin bat egiten du guretzat: EKPren 25. urteurrena. Mende laurden honetan, gure konpromisorik handiena izan da aisialdiko nabigazioa Euskadin sendotzea. Urte hauetan zehar, sektorean izandako bilakaera ikaragarria ikusi dugu, eta harro esan dezakegu EKPren historia gure lurraldeko aisialdiko nabigazioaren historia dela.
Baina bidaia hau ez dugu bakarrik egin. Gure ontzian tripulazio bikaina izan dugu bidelagun, eta ezinbesteko aliatuak, hala nola klub nautikoak, tartean Hondarribiko Klub Nautikoa. Halaber, nabarmendu nahi dugu Ababor azoka, hiru edizio hauetan, Ficobaren eskutik, ezinbesteko topagune bihurtu baita. Ez du bakarrik gure erabiltzaileei merkatuaren azken berrikuntzak hurbiltzen, baizik eta sektorea biziberritu eta sendotzen laguntzen du jarduera eskaintza zabala eskainiz. Horregatik guztiagatik, Ababor gure tripulazioaren parte dela esan dezakegu zalantzarik gabe.